5 onderhoud-foute wat voorbereide mense steeds maak

Woensdag, November 2nd, 2016

Lauren Laitin

 

 

Nou ja, jy het die werwer se siftingsoproep geslaag en die onderhoud is gereël. Natuurlik wil jy baie goed vaar en jy gaan deur jou kontrolelys van goed wat jy moet doen om gereed te wees. Soms is dit egter net so belangrik om die goed te onthou wat jy nie moet doen nie. Selfs die slimste en belowendste kandidate trap op die groot dag by tye klei tydens hierdie sleuteldeel van die proses.

Hier onder is vyf foute wat jy waarskynlik gemaak het sonder om daarvan bewus te wees. As jy hulle vermy, sal jy waarskynlik langer ʼn aanspraakmaker wees.

 

  1. Jy weet nie hoekom jy daar is nie

As jy lank gesoek het of jy smag na verandering is dit maklik om die belangrikheid van ʼn kritiese oog te vergeet. Vandag se manier om net op ʼn knoppie te klik, maak dit baie maklik om outomaties aansoek te doen. Goed, dit kan jou by die onderhoud kry maar dit sal nie vir jou die werk kry nie. Om na daardie vergadering te gaan sonder ʼn baie duidelike begrip van hoekom jy belangstel en hoekom jy die perfekte persoon vir die pos is, sal sleg eindig vir jou.

So, benewens navorsing oor die maatskappy (wat almal weet ʼn moet is), moet jy ook jouself ondersoek. Hoe pas hierdie pos by jou groter doelwitte in? Watter vaardighede sal jy by hierdie maatskappy kan ontwikkel en hoekom maak dit vir jou saak? Hoe het jou vorige poste jou vir hierdie geleentheid voorberei? Kan jy hierdie pos vereenselwig met wat vir jou belangrik is? Die antwoorde op vrae soos dié sal dit vir jou duidelik maak wat dit is waarvan jy hou aan die pos en wat jy daaruit wil haal. Kortom, dit sal jou daaraan herinner dat jy ook ʼn besluitnemer is in hierdie spel.

 

  1. Jy het vergeet om jou energie saam te bring

Jy moet so uitgerus as moontlik opdaag. Ja, adrenalien kan vir ʼn ruk werk en jou gefokus en skerp hou, maar wanneer dit uitwerk, los dit jou verlep. Werkgewers stel mense aan wat selfgemotiveer en gefokus is: hulle wil weet dat jy energie en dryfkrag aan die span sal oordra. Om die waarheid te sê, baie maatskappye sal wil weet dat jy hard kan werk en hard kan speel.

Nie alleen moet jy wakker wees tydens die gesprek nie, maar jy moet ook voluit deelneem as die maatskappy se missie bespreek word. As jy nie geesdriftig voel by die onderhoud nie, is dit moeilik om mens voor te stel dat jy op enige gegewe dag geesdriftig oor jou werk sal voel. Daar is baie maniere om ʼn bietjie woema by die onderhoud te voeg, soos om op te staan (as dit ʼn telefoniese onderhoud is) en te glimlag (as dit persoonlik is). Wees ook gereed om ʼn gepaste storie te vertel wat jou goed laat lyk. Selfs al het jy die storie al 1 000 keer vertel ─ maak seker dat dit jou met trots, geluk of ʼn gevoel van sukses vul. Entoesiasme is aansteeklik en die onderhoudvoerder sal jou dryfkrag en vasbeslotenheid aanvoel.

 

3. Jy laat jouself in ʼn wip vang

Dit maak nie saak hoeveel negatiewe gedagtes jy oor jou huidige of vorige werkgewer koester nie, hou dit vir jouself. Om jou uit te laat daaroor stel nie net vir jou in ʼn slegte lig nie maar sal ook die onderhoudvoerder laat wonder wat jy oor hom of haar gaan sê as dinge nie goed gaan nie. Maar soms, selfs met die beste voornemens, word mens gekonfronteer met ʼn vraag oor dít waarvan jy in jou huidige pos of maatskappy nie hou nie.

As jy in ʼn hoek gedryf word, wees eerlik maar ook strategies. As jy nuwe werk soek omdat jy moeg is van die kantoorkultuur, identifiseer ʼn konkrete rede waarom jy ʼn skuif wil maak. Jy wil byvoorbeeld in ʼn ander rigting spesialiseer, of jy wil ʼn nuwe tipe verantwoordelikheid hê, of jy is gereed vir die uitdaging om ʼn nuwe aspek van die besigheid te leer. Dit sal die vraag effektief beantwoord sonder om jou karakter in gedrang te bring.

 

4. Jy staar na die muur

Hierdie een lyk ooglopend, maar is tog vir baie kandidate ʼn probleem. Jy moet kontak maak om die werk te kry. Die maklikste manier om dit te doen, is om oogkontak te maak. (Nog ʼn rede om hieraan te werk: ʼn gebrek aan oogkontak kan ʼn aanduiding wees dat jy ongemaklik en onseker is, of selfs dat jy jok.)

Hierdie eenvoudige gebaar sê “Ek luister na wat jy sê”. As dit vir jou ʼn uitdaging is, oefen met vriende. Per slot van sake, jy moet op die persoon gefokus bly die heel tyd dat hy of sy praat, selfs al kry die onderhoudvoerder dit nie so goed reg om jou in die oë te kyk nie. Dis altyd lekker as daar aan albei kante goeie onderhoudvaardighede is, maar jy kan net jou eie kant beheer. Behalwe om dit duidelik te stel dat jy die beste persoon vir die werk is, moet jy ook let op wat jou lyftaal sê of nie sê nie. Professionele wenk: doen wat die indiensnemingsbestuurder doen — dit verrig wondere.

 

5. Jy kan nie ophou borrel oor hoe baie jy van die maatskappy hou nie

Dit is ongetwyfel belangrik om entoesiasties te wees, maar ek sou eerder iemand wou hê wat ʼn bietjie blasé is as iemand wat die heel tyd opgemaakte stories wil vertel. Weet wat aangaan, weet waaroor die maatskappy gaan, maar moet dit nie oordoen nie. Bly binne perke met ʼn paar opmerkings oor die aspekte van die maatskappy waarvan jy werklik hou. Jy kan ʼn artikel of twee of ʼn mediaberig noem wat jy raakgeloop het, maar moenie elke geringste stukkie of berig noem met die hoop dat dit jou die werk sal laat kry nie.

Hoewel dit waar is dat baie organisasies wil sien dat die kandidaat werklik daarin belangstel om daar te werk, soek die meeste nie na ʼn obsessiewe uitstorting van liefde en bewondering nie. Bly binne perke en wees oordeelkundig met die lofprysing.

As jy hierdie foute kan vermy, sal jy slaag by die onderhoud en weggaan met die wete dat jy alles moontlik gedoen het ─ en niks wat jy nie veronderstel was om nie te doen nie. Selfs al besluit jy die betrekking is nie reg vir jou nie sal jy beter daaraan toe wees want jy het hierdie netelige deel van die proses oorwin en sal selfs meer voorbereid wees vir die volgende een. Kort voor lank sal jy wel uitkom by ʼn maatskappy wat reg is vir jou.

 

Bron: The Muse

  •  
  •  
  •  
  •  

Ander Artikels

Mediese wetenskaplike: Wat behels dié beroep?
Karen van der Berg   Vir prof. Gerhard Walzl is mediese navorsing soos om lid van ʼn aflosspan te wees – die aflosstok moet aangegee word om die momentum te behou. Prof. Walzl is die hoof van die Universiteit Stellenbosch se Departement van Biomediese Wetenskappe. Maar wat behels ʼn mediese wetenskaplike se beroep? Vir hom […]
Wat behels ʼn beroep in die onderwys werklik?
Cyril Blackburn   Om ʼn onderwyser te wees, is ʼn edele beroep: Elke onderwyser het gedurende sy of haar loopbaan die geleentheid om ander te help ontwikkel en ʼn daadwerklike impak te maak sodat ʼn diverse groep leerders hulle volle potensiaal kan bereik. Die onderwys is ongelukkig ook een van die beroepe met die meeste […]
Tegnologie sal baie dokters, prokureurs en ander vakkundiges vervang
Richard Susskind en Daniel Susskind   Teen die agtergrond van die bewering dat kunsmatige intelligensie (KI) en robotte sit en wag om die grootste deel van vandag se werkmag  te vervang, glo die meeste van vandag se hoofstroomvakkundiges ─ dokters, prokureurs, rekenmeesters, ensovoorts ─ dat hulle grootliks ongeskonde anderkant sal uitkom. Tydens ons konsultwerk en […]
1 2 3 55