Aptekerwese: Dit gaan nie net oor pille tel

Donderdag, Februarie 2nd, 2017

Karen van der Berg

As jy ’n passie het om siek mense te help en ʼn groot belangstelling in mediese sake het, kan aptekerswese dalk net die loopbaan wees vir jou. Daar is juis ʼn tekort aan aptekers in Suid-Afrika. Die werkmoontlikhede is groot.

Tiaan Aggenbach (30) van Bloemfontein vertel meer oor sy loopbaan as  ʼn apteker. Hy het vyf jaar gelede gekwalifiseer.

“Ek was nog altyd gefassineer deur mediese stories en onderwerpe, maar ek wou nooit ʼn dokter word nie. Ek was nog nooit spyt oor my keuse nie.”

Hy sê daar is ʼn groot aanvraag na aptekers, so die verskeidenheid van plekke waar ʼn mens kan gaan werk is groot.

“Wat ook lekker van ons beroep is, is hoe meer ervaring jy opdoen, hoe beter die salaris wat jy kan verwag.”

Vir Tiaan is dit ook ʼn baie menslike beroep.

“Dit is baie lekker om ʼn betekenisvolle verskil in mense se lewe te maak. Dit verskaf baie vreugde aan my as mense terugkom en kom terugvoer gee oor hoe spesifieke medikasie hulle gehelp het of hoe wonderlik dit was toe ek hulle in ʼn noodgeval bygestaan het.”

Een van die groot uitdagings van die beroep is die verantwoordelikheid om baie akkuraat te kan werk. “Die verkeerde medisyne kan baie negatiewe gevolge hê. Daar is baie druk om alles presies reg te doen.”

Opleiding

Tiaan sê die meeste universiteite in Suid-Afrika bied ’n graad in farmakologie aan, wat vier jaar duur. Vakke sluit chemie, fisika, anatomie, biochemie, organiese chemie, patologie en verskeie farmakologiese vakke in. Studente mag ná hul eerste studiejaar as ’n aptekersassistent registreer. Hulle kan dan deeltyds in ’n apteek onder die wakende oog van ’n geregistreerde apteker werk. Nadat jy graad gekry het, moet jy ’n jaar lange praktiese opleidingsperiode deurloop. Daarna moet jy nog ’n jaar verpligte gemeenskapsdiens in die openbare hospitaalsektor voltooi, voordat jy as ’n apteker kwalifiseer. Jy kan ook ná die vierjaargraad ’n meestersgraad van twee jaar volg.

Sy wenke aan studente wat die loopbaan oorweeg is:

  • wees voorbereid daarop om baie ure agter jou boeke deur te bring; die kursus verg baie studietyd en die program is baie vol;
  • lees mediese tydskrifte en joernale vir bykomende inligting oor die vakgebied en nuwe ontwikkelinge in die mediese veld;
  • as iemand jou raad nodig het en jy is nie heeltemal seker nie, moenie huiwer om een van jou medeaptekers te raadpleeg nie; daar word nie van jou verwag om alles te weet nie;
  • doen soveel moontlik praktiese ondervinding op terwyl jy studeer; dit kan baie deure vir jou oopmaak; en
  • doen moeite om jou pasiënte te leer ken want jy kan ʼn lang pad saam met hulle stap.
  •  
  •  
  •  
  •  

Ander Artikels

Mediese wetenskaplike: Wat behels dié beroep?
Karen van der Berg   Vir prof. Gerhard Walzl is mediese navorsing soos om lid van ʼn aflosspan te wees – die aflosstok moet aangegee word om die momentum te behou. Prof. Walzl is die hoof van die Universiteit Stellenbosch se Departement van Biomediese Wetenskappe. Maar wat behels ʼn mediese wetenskaplike se beroep? Vir hom […]
Wat behels ʼn beroep in die onderwys werklik?
Cyril Blackburn   Om ʼn onderwyser te wees, is ʼn edele beroep: Elke onderwyser het gedurende sy of haar loopbaan die geleentheid om ander te help ontwikkel en ʼn daadwerklike impak te maak sodat ʼn diverse groep leerders hulle volle potensiaal kan bereik. Die onderwys is ongelukkig ook een van die beroepe met die meeste […]
Tegnologie sal baie dokters, prokureurs en ander vakkundiges vervang
Richard Susskind en Daniel Susskind   Teen die agtergrond van die bewering dat kunsmatige intelligensie (KI) en robotte sit en wag om die grootste deel van vandag se werkmag  te vervang, glo die meeste van vandag se hoofstroomvakkundiges ─ dokters, prokureurs, rekenmeesters, ensovoorts ─ dat hulle grootliks ongeskonde anderkant sal uitkom. Tydens ons konsultwerk en […]
1 2 3 55