Sjef-wees is nie vir sissies nie

Vrydag, Februarie 17th, 2017

Karen van der Berg

Om ʼn sjef te wees gaan oor baie meer as die prentjie wat ons op TV sien. Op TV sien ons dit is om met ’n wit voorskoot voor ’n splinternuwe, indrukwekkende gasstoof te staan en wonderlike disse op te tower, wat baie romanties lyk en selfs soos groot pret. Hierdie geromantiseerde idee kan egter aan die tientalle kosprogramme wat op TV te sien is toegeskryf word – van Masterchef tot Kokkedoor, Gordon Ramsay tot Rueben Riffel –  al wat beef is skouspelagtig aan die kook, maar om sjef te wees gaan oor innoverende denke, lang ure op jou voete, om te werk wanneer die res van die mensdom ontspan, asook beplanning en bestuur. Dit is soos om ʼn honderd balle in die lug te hou terwyl jy onder ongelooflike hoë druk is.

So vertel Rudolf van der Berg (34), sjef en eienaar van die bekroonde restaurant Burgundy, in Hermanus.

Rudolf het ’n twee jaar diploma aan die bekende ICA-sjefskool in Stellenbosch gedoen. “Maar ’n kwalifikasie maak allermins van jou ’n sjef. Harde werk sonder enige erkenning, is eerder belangrik.”

Wat is ’n sjef?

Dit is ’n persoon wat ’n onversadigde passie en begeerte het om bestanddele saam te voeg en dit dan te omskep in bobaas geregte, met ’n mooi storie daarby. Die disse moet die vermoë hê om kliënte opgewonde oor die lewe te maak. Die sjef moet ook oor die vermoë beskik om sy personeel sinvol te bestuur, om te delegeer, en om die kosvoorraad uitmuntend te kan vooruitskat en te bestuur.

Rudolf sê die TV het beslis ’n bewustheid oor sjefs se vermoëns geskep, maar die beeld is nie heeltemal realisties nie.

“Om ’n sjef te wees, is nie so glansryk soos wat dit voorgestel word nie. In suksesvolle restaurante is die druk dubbeld wat dit uitgemaak word. Die koste van produkte is ook van baie groter belang. In Masterchef is daar byvoorbeeld nie regtig ’n begroting of ’n beperking op produkte om mee te kook nie.”

Vir Rudolf is daar baie wonderlike bestanddele.

“Ek kan egter nie sonder goeie, vars olyfolie kosmaak nie. Enige iemand wat kos maak moet in ʼn goeie olyfolie belê.”

Vir Rudolf kan ’n kombuis verder ook nie sonder lojale personeel funksioneer nie. “Dit moet personeel wees wat jy kan vertrou, personeel wat op ’n besige dag selfs tot ’n 1 000 mense kan kos gee sonder om op te hou lag. Daarsonder kan ’n restaurant nie suksesvol wees nie.”

Hoe hou jy jou personeel gemotiveerd, veral gedurende die hoogseisoen waar hulle dan heeldag op hulle voete is?

“Ek het ’n besonderse band met my personeel en ek leer hulle dat ons restaurant ’n geskenk van die Here af is. Ek probeer hulle leer om elke dag hierdie geskenk op te pas. Die goue reël is: elke klant is vir ons goud werd. Die klant kom eerste, nie die sjef se voorkeure nie.”

Rudolf sê dit gebeur wel dat sjefs moeg word vir kos.

“As dit met my gebeur, gooi ek ’n lekker stukkie vleis op die vuur. Dit laat my beter voel.”

  •  
  •  
  •  
  •  

Ander Artikels

Mediese wetenskaplike: Wat behels dié beroep?
Karen van der Berg   Vir prof. Gerhard Walzl is mediese navorsing soos om lid van ʼn aflosspan te wees – die aflosstok moet aangegee word om die momentum te behou. Prof. Walzl is die hoof van die Universiteit Stellenbosch se Departement van Biomediese Wetenskappe. Maar wat behels ʼn mediese wetenskaplike se beroep? Vir hom […]
Wat behels ʼn beroep in die onderwys werklik?
Cyril Blackburn   Om ʼn onderwyser te wees, is ʼn edele beroep: Elke onderwyser het gedurende sy of haar loopbaan die geleentheid om ander te help ontwikkel en ʼn daadwerklike impak te maak sodat ʼn diverse groep leerders hulle volle potensiaal kan bereik. Die onderwys is ongelukkig ook een van die beroepe met die meeste […]
Tegnologie sal baie dokters, prokureurs en ander vakkundiges vervang
Richard Susskind en Daniel Susskind   Teen die agtergrond van die bewering dat kunsmatige intelligensie (KI) en robotte sit en wag om die grootste deel van vandag se werkmag  te vervang, glo die meeste van vandag se hoofstroomvakkundiges ─ dokters, prokureurs, rekenmeesters, ensovoorts ─ dat hulle grootliks ongeskonde anderkant sal uitkom. Tydens ons konsultwerk en […]
1 2 3 55