Sport is in sy ink!

Woensdag, Januarie 20th, 2016

Karen van der Berg

 

As daar een ding is waaroor die meeste Suid-Afrikaners mal is, is dit ongetwyfeld sport. Of dit nou rugby, sokker, krieket of atletiek is, mense hier het ’n brandende passie daarvoor. Dit is daarom nie vreemd dat alle koerante groot afdelings aan sport afstaan nie. Maar presies wat behels die werk van ’n persoon wat die bladsye moet vol skryf? Solidariteit het gaan uitvind.

Jóhann Thormählen, ’n rugbyskrywer in Bloemfontein vir Sport24 se koerante (Beeld, Die Burger, Volksblad en Rapport), het ’n paar vrae beantwoord.

 

Vertel ’n bietjie meer van jou werk

 

My werk behels om eerste te wees met nuus uit die streek wat rugby betref. My hooftaak is om daagliks oor die Cheetahs in die Super- en Curriebeker-reekse verslag te doen. Ek skryf dus stories wat handel van beserings, wedstrydverslae, onderhandelings in die raadsale en skuiwe van spelers. Ek lewer ook verslag oor ander rugbyspanne in die streek soos dié in die Vodacombeker-reeks, Vrystaatse junior spanne en die Shimlas. Dan help ek ook video’s maak en berigte skryf vir Netwerk24.

 

Wat en waar het jy studeer?

Ek het BA Internasionale Studies aan die Universiteit van Stellenbosch studeer en daarna my BPhil in joernalistiek daar gedoen.

 

Het jy altyd daarvan gedroom om ’n sportverslaggewer te word?

Dit was een van die moontlikhede in die joernalistiek wat ek oorweeg het. Sport was van kleins af een van my baie passies en dit is lekker om dit en die liefde vir tale (spesifiek Afrikaans) te kan kombineer.

 

Wat is die lekkerste en slegste deel van jou werk?

Die lekkerste deel is beslis om een van my natuurlike belangstellings as beroep te kan beoefen. Dit is heerlik om oor sport te kan skryf, aangesien ek ook ’n sportliefhebber is. Om direk met spelers en afrigters wat dikwels baie ondersteuners se helde is te kan werk, is ook ’n voorreg.

Die slegste deel is beslis die ure wat ’n sportverslaggewer, spesifiek rugbyskrywer, werk. Sportwedstryde word oor naweke gespeel en dus is dit ook die tyd wat jy moet werk wanneer jou vriende en familie ontspan.

 

Raad aan enige studente wat die beroep wil volg?

Hou aan hard werk, volg jou passie en moenie moed opgee nie as jy eers in ander afdelings van die media (wat nie sport is nie) moet werk. As student is die eerste stap beslis om by ’n kampus- of gemeenskapskoerant betrokke te raak en oor koshuisrugby of universiteitsreekse te skryf.

 

Is daar ‘n toekoms vir sportverslaggewers by koerante?

Ja, daar is beslis ’n toekoms vir sportverslaggewers. Al kry koerante al hoe swaarder, sal sport steeds een van die belangrikste dinge wees waaroor mense wil lees. Sport sal van die laaste onderwerpe wees waarsonder ’n koerant oor die weg kan kom.

  •  
  •  
  •  
  •  

Ander Artikels

Mediese wetenskaplike: Wat behels dié beroep?
Karen van der Berg   Vir prof. Gerhard Walzl is mediese navorsing soos om lid van ʼn aflosspan te wees – die aflosstok moet aangegee word om die momentum te behou. Prof. Walzl is die hoof van die Universiteit Stellenbosch se Departement van Biomediese Wetenskappe. Maar wat behels ʼn mediese wetenskaplike se beroep? Vir hom […]
Wat behels ʼn beroep in die onderwys werklik?
Cyril Blackburn   Om ʼn onderwyser te wees, is ʼn edele beroep: Elke onderwyser het gedurende sy of haar loopbaan die geleentheid om ander te help ontwikkel en ʼn daadwerklike impak te maak sodat ʼn diverse groep leerders hulle volle potensiaal kan bereik. Die onderwys is ongelukkig ook een van die beroepe met die meeste […]
Tegnologie sal baie dokters, prokureurs en ander vakkundiges vervang
Richard Susskind en Daniel Susskind   Teen die agtergrond van die bewering dat kunsmatige intelligensie (KI) en robotte sit en wag om die grootste deel van vandag se werkmag  te vervang, glo die meeste van vandag se hoofstroomvakkundiges ─ dokters, prokureurs, rekenmeesters, ensovoorts ─ dat hulle grootliks ongeskonde anderkant sal uitkom. Tydens ons konsultwerk en […]
1 2 3 55