Deur Melodie Veldhuizen

Is jy ʼn gereelde teaterganger ? Het jy al ooit gewonder wat alles agter die skerms gebeur om ʼn suksesvolle vertoning op die planke te kan bring? Een van die belangrikste rolspelers in die teaterwêrld is die teaterbestuurder.

Wat is ʼn teaterbestuurder?

ʼn Teaterbestuurder is verantwoordelik vir die bestuur van die algemene bedryf, instandhouding en winsgewendheid van die teater.

Wat behels die pligte en verantwoordelikhede van ʼn teaterbestuurder?

Jou pligte as teaterbestuurder sal in ʼn mate ook afhang van die grootte van die teater waar jy werksaam is.

• Die persoon is in beheer van die bemarking, indiensneming en bestuur van personeel, asook die teater se finansies en is ook verantwoordelik vir kliëntetevredenheid.
• Jy kan byvoorbeeld nou saamwerk met produksiespanne om die teater se jaarlikse produksiekalender saam te stel.
• Daarbenewens werk jy deurlopend saam met die direkteurs of vervaardigers aan die beplanning en bestuur van produksies in ooreenstemming met die teater se begroting en maak seker dat daar aan die teater se beleid voldoen word.
• Ontwikkel, hersien en gee uitvoering aan die teater se sakeplan.
• Beplan die teaterprogram en verseker dat daar ʼn balans gehandhaaf word tussen die verskeie tipes produksies. Dit behels ook onderhandeling en skakeling met die onderskeie produksiemaatskappye. Dis ook belangrik om ter wille van latere beplanning kennis te neem van watter tipe produksies gewild was en watter nie.
• Verseker dat die teaterprogram aan die vereistes van die sakeplan voldoen deur dit voortdurend te moniteer.
• Bestuur die begroting en verseker dat jy aan die finansiële en bedryfsdoelwitte van die teater voldoen.
• Verskaf leiding aan die res van die personeel wat onder andere betrokke is by finansies en administrasie.
• Verseker dat die teater aan al die wetlike vereistes soos gesondheid en veiligheid voldoen.
• Bestuur hulpbronne effektief.
• Onderhandel met liefdadigheidsorganisasies en/of ander befondsingsliggame vir finansiële steun aan die teater.
• Ontwikkel vennootskappe met ander organisasies.
• Bly op die hoogte van nuwe ontwikkelinge in die bedryf en van nuwe produksies.
• Jou werk is hoofsaaklik kantoorgebonde.

Vereiste vaardighede

• leierskapsvaardighede
• verantwoordelikheidsin
• organisatoriese vaardighede
• kennis van en passie vir die kunsbedryf
• uitstekende kommunikasievaardighede
• moet in ʼn span kan werk
• goeie besigheidsin om te verseker dat die teater winsgewend is
• aandag aan besonderhede
• vermoë om onder druk te werk
• buigsaamheid
• kreatiewe probleemoplossingsvaardighede

 Werkgeleenthede

Met die vereiste kwalifikasies sal jy by enige teater van enige grootte kan werk.

Werkure

ʼn Teaterbestuurder se werkure word deur die skedule van die teater bepaal. Dis meestal saans en oor naweke. Jy moet ʼn geruime tyd voor die aanvang van die vertoning al op jou pos wees en sal eers ʼn ruk na die vertoning, wanneer die teater opgeruim en ontruim is, kan huis toe gaan.

Verwagte salaris

Dit word gewoonlik bepaal deur die grootte van die teater.

Vereiste skoolvakke

Om kunstebestuur of  besigheidsbestuur te gaan studeer, word die volgende skoolvakke aanbeveel: Drama, Afrikaans, Engels, Kuns, Besigheidstudies en Inligtingstegnologie.

Waar kan jy studeer en wat is die toelatingsvereistes?

Doen navraag by die universiteit van jou keuse oor die aanbevole kwalifikasies om jou as teaterbestuurder te bekwaam. Die onderstaande tersiêre instansies word sterk aanbeveel:

Universiteit van Stellenbosch

Universiteit van Pretoria

Universiteit van Witwatersrand (Wits)

Noordwes-Universiteit (Potchefstroom). Artéma, hul instituut vir kunstebestuur en -ontwikkeling, bied ook kort kursusse aan wat baie voordelig vir teaterbestuur is.

Vereiste kwalifikasies

Om as teaterbestuurder te kwalifiseer, moet jy een van die volgende grade hê:

BA in Uitvoerende Kunste met Kunstebestuur as hoofvak

BCom (Besigheidsbestuur)

Carien Bloem is die afgelope 18 maande bestuurder by die AfriForum Teater. Ons gesels met haar oor haar werk.

Wat presies behels jou werk by die AfriForum Teater?

Ek is verantwoordelik vir die voorhuis van die teater (front of house’), die besprekings en die vlot verloop van vertonings. Dan maak ek seker dat die kleedkamers gereed is vir die kunstenaars en dat dit aan al hul behoeftes voldoen. Wanneer die kunstenaars vir die vertoning opdaag, ontvang en verwelkom ek hulle.

Verder bestuur ek die teater se voordeurpersoneel wat die gaste ontvang en kaartjies nagaan. Ek maak seker al die reëlings rakende  kaartjies en komplimentêre kaartjies is deurgegee aan die betrokke partye en dat  alle spesiale versoeke hanteer word. Ek beantwoord navrae en bestuur ook programverkope indien die vertoning dit versoek.

Watter aspekte van jou werk geniet jy baie?

Dit is heerlik om in ʼn kreatiewe en kunstige omgewing te werk. Dit is ook baie lekker om mense se positiewe ervarings waar te neem nadat hulle ʼn vertoning bygewoon het.

Is daar aspekte van jou werk waarvan jy nie hou nie?

Dit is ʼn baie administratief georiënteerde werk, en dis belangrik om kop te hou en besprekingsinligting by te hou. Dit kan soms uitputtend en dreinerend wees.

Wat sou jy vir ʼn voornemende student sê wat dit oorweeg om teaterbestuur as loopbaan te kies?

• Dit is baie belangrik om ʼn liefde en aanvoeling vir die kunste te hê.
• Goeie menseverhoudings en kommunikasievermoëns, asook probleemoplossingsvaardighede is noodsaaklik.
• Jy moet inisiatief kan neem.
• Jy moet bereid wees om lang ure te werk.

Bronne

Fundiconnect. https://fundiconnect.co.za/career_profiles/theatre-manager/

Carien Bloem, Manager, AfriForum Theatre. carien.bloem@afriforum.co.za